Askvoll Pensjonistlag

Pensjonistforbundet Sogn og Fjordane

29 personar deltok på denne dagsturen til Bulandet. Koseleg prat over ein kopp kaffi opå ferja. transporten skjedde med privatbilar frå Værlandet kai. ......

Dagstur til Bulandet

25 personar møtte fram til årsmøtet. Velkomst ved leiar Solveig Sølvberg og 1 min stille for å minnast medlemmer som har gått bort siste året. Etter allsongen " Vesle lerka" hadde Kari Fismen ord for dagen. Med tanke på rekneskap og budsjett handla det om pengar. Årsmøtet vart losa greitt i hamn ved ordstyrar Øystein Helle. Valnemnda hadde gjort ein god jobb med å finne personar til styret. Ingen innstilt som leiar, framlegg om at styret konstituerer seg sjølv. Framlegget blei vedtatt. Framlegg frå styret om valnemnd også vedtatt.

Etter gode snittar, kaffi og song var det utdeling av Pensjonistforbundet sine nåler til tillitsvalde som har gjort ein innsats for lokallaget. Dernest blomster til tillitsvalde som går ut av styret og nemnder.

Bjarne Haugen hadde så eit innslag med gode historier, som fekk fram humør og latter.

Som avslutning var tema: Kva slags treff ynskjer medlemmene framover?

Det kom fram flest synspunkt på at ein ynskjer å fortsette med treff på Sjøbuene, der ein betalar det det kostar med servering av snittar eller liknande. Elles semje om at innhald slik det går fram av handlingsplanen er OK.

Årsmøte 15.02.23

36 personar møtte fram til januartreffet i Askvoll pensjonistlag. Etter allsong, ord for dagen og velkomst ved Kjell Grane, fekk Silje Heggheim Mjåseth ordet. Ho er geriatrisk sjukepleiar og med i demensteam i Askvoll kommune. Ei lydhør forsamling fekk ei god orientering generelt om demens og korleis Askvoll har bygd opp ei teneste som skal møte utfordringar knytt til denne sjukdommen. Spørsmål og kommentarar etterpå vitna om stor interesse for tema. Kari Fismen ga ordet til Vlada Tsytsurka og Astrid Halstensen, ny og avtroppande leiar av Frivilligsentralen. Det nærmar seg innflytting i Sentrumsgarden, og dei ga uttrykk for at dei ser fram til samarbeid med pensjonistlaget og andre organsasjonar. Alle 3 fekk tulipanar som takk for innsatsen.

Matøkt bestod denne gongen av Wraps/potetlefse med fyll, kaffi og twist.

Solveig hadde ei kort orientering om aktivitet i lokal- og fylkeslag. Aktuelt er gratis datakurs for medlemmer i byrjinga av mars. Nærmare opplysningar vil fylgje om tid og stad.

Avslutning på treffet var underhaldning ved Jarl Audun Rivedal og Jakob Øyren; trekkspel og gitar. Sentralt var allsong med introduksjon av den nye songboka Jukebok S.

Solveig takka alle for frammøtet og ynskte velkommen til samling på biblioteket mandag 30.01. kl 10.30 der lensmann Åge Løseth møter og gir informasjon om prosjektet Innbyggarstemma i polititenesta. Ho minte også om neste treff som er årsmøte 15.02.

Pensjonisttreff  25.01.23

Vil du vere med på kurs ?

*   Bruk av PC
*   Nettbrett med funksjonar og appar
*   Mobiltelefon med funksjonar og appar
*   Andre tema etter behov: Helse Norge, bank, reiser og bestilling av reiser m.m.

Som medlem i Pensjonistforbundet får du tilbod om gratis kurs.

Frode Hoff og Magnus Gudvangen er kursleiarar og gjer tilpassing i forhold til medlemmene sine behov.

Er du interessert, meld frå til mobilnr 906 42 575.

KURSTILBOD

45 personar møtte til treffet. Kari Fismen ynskte alle velkomne, og treffet blei opna med allsong "Ja, nå er det oktober". Dagmund Vindheim hadde 2 musikkinnslag på munnspel og dedikerte den eine melodien til dei som opplever krig i Ukraina. Ord for dagen ved Kari "Omega Seamaster" (frå Brestar og Blikk) av Leiv Arne Grimstad var ein fin overgang til foredrag ved Anne-Cathrine Neslein, som representerte Pensjonistforbundet Sogn og Fjordane. Tema for foredraget var velferdsteknologi, eit område som omfattar alt frå enkle hjelpemiddel i kvardagen til avanserte løysingar på ulike problem. Med mange døme fekk vi forståing av eit emne som er aktuelt for oss på mange måtar og vil vere viktig i framtidas helsetenester. Til stades var også representantar frå Askvoll kommune: ergoterapeut Alice Eimhjellen, som har ansvar for hjelpemiddelformidling og Stine Herland Sund, som har eit ansvar innan velferdsteknologi. Begge orienterte om sine arbeidsoppgåver. Som takk for sin innsats fekk Anne-Cathrine Neslein ei gåve med "godis" frå Delikatessen.

Song før kaffiøkta var "Skal gamalt venskap kverva bort". Etter kaffi og gode snittar hadde Solveig Sølvberg ein kort informasjon frå styret. Haustkonferansen gjekk av stabelen 11. og 12. oktober i Sogndal, 3 representantar frå styret deltok på denne.

"Ja de penga" var allsong før åresalet. Styret hadde ansvaret for gevinstar denne gongen. Fleire av bedriftene i Askvoll hadde gitt gåver. Trekking via app.

Avslutning med allsong "La oss leve for hverandre".

Pensjonisttreff 19.10.22

Til førjulsfesten i Askvoll pensjonistlag møtte 53 personar. Ein nydeleg dag i Askvoll med blikkstille og flott solnedgang. Kjell Grane ynskte velkommen, vi song Det lyser i stille grender og ordet for dagen ved Kjell, var også ved Jacob Sande "Då Gud heldt fest i Fjaler". Per Jon Odeen fekk ordet og snakka om sin eigen barndom og oppvekst i Årdal i 50-åra. Her var mykje å kjenne seg igjen i og mykje som var spesielt for industribygda. Solveig Sølvberg takka PJO for foredraget, og han fekk med seg ei bok om Anders Askevold som reiselektyre på Expressen tilbake til Bergen. På litt "overtid" blei juletallerken servert; stryremedlemmene bar rundt maten. Skøy, som skulle underhalde, hadde fleire gjeremål på sin plan, så dei fekk starte opp samstundes med servering av dessert og kaffi. Dei hadde mange gode innslag og skapte god stemning. Siste halvtimen var det dansemusikk, og ein del nytta sjansen til ein svingom. Opplysningar til slutt ved Solveig Sølvberg var fylgjande: neste treff skal vere 25. januar på Sjøbuene, Møteplassen på biblioteket er ope 2 veker til før jul og opplysningar om kurs blir å finne på pensjonistlaget si nettside, i tillegg til kunngjering på sms. Solveig takka elles for frammøtet og ynskte alle ei god adventstid og god jul.

Førjulstreff  30.11.22

56 personar var samla til fest. Øystein Helle leia fyrste del og ynskte alle hjarteleg velkomne, med ei spesiell helsing til dei innbedne gjestene. Desse var Nils Gjerland, leiar i Pensjonistforbundet Sogn og Fjordane, Arne Rognaldsen, styremedlem i fylkeslaget og "fadder" for Askvoll pensjonistlag, Nils R. Sandal, Helene Hertzberg Ask og musikarane RamSkogÅs. Etter allsongen "Pensjonistenes velkomstsang", akkompagnert av Andreas Ramstad på trekkspel, leste Helene Hertzberg Ask prologen, som Adolf Ask skreiv til skipingsmøte for Askvoll pensjonistlag 11. januar 1972, i Askvoll Samfunnshus.

Nils R. Sandal, som stod for festtalen, fekk så ordet. Han heldt ein flott tale, der han m.a. snakka om solidaritet som viktig grunnlag for Pensjonistforbundet og lokallaga. Han framheva også verdien av å gi liv til åra ved å vere aktiv sosialt. Med god stemme og ledig framføring nådde han alle i salen.

Etter allsongen "Vandringsmenn i verden vide" hadde Solveig Sølvberg ein kort historikk på bakgrunn av laget sine protokollar og 20 års jubileumsskriv. Jubileumsskrivet gir god kunnskap om aktiviteten i laget dei fyrste 20 åra. Frå starten av var Askvoll pensjonistlag eitt av 5 lag i fylket og var med på skipingsmøtet av fylkeslaget seinare same år. Etter 15 år fekk laget "eige hus" i den gamle doktergarden og hadde dette i fleire år. Aktive leiarar, tillitsvalde og medlemmer gjorde at det var stor aktivitet i laget og arrangering av turar stod sentralt. Sidan 2015 har det vore vanskeleg å få leiarar i pensjonistlaget, og i dei fleste åra etterpå har det vore arbeidsstyre, som har konstituert seg sjølv.

RamSkogÅs stod så for eit par flotte musikk- og songinnslag; Andreas Ramstad trekkspel, Knut Skoghei fele og trekkspel, Atle Åsnes gitar.

Matøkt: Solveig Steinseth hadde laga nydeleg rømmegraut, som smakte godt saman med spekemat og flatbrød.

Etter maten allsongen "Dalsfjordvalsen", akkompagnert av Andreas Ramstad.

Helsingar: Nils Gjerland hadde med helsing frå Pensjonistforbundet Sogn og Fjordane med gode ord og gåve på kr 500. Han framførde også ein tekst med kleskåpet som tala sitt eige språk og vitna om levd liv. Kari Fismen takka for gåve og tale. Ho takka også for flott blomsterhelsing frå Florø pensjonistlag.

Solveig Sølvberg overrekte nål og blomsterbukett til Kirsten Grane, som takk for flott innsats gjennom felire år i lokallaget. Kirsten har vore leiar i 4 år og elles hatt fleire verv i styret gjennom dei siste 10 åra. Sveinung Kristiansen fekk overrekt nål og rose med takk for innsats gjennom mange år som leiar i turgruppa og kasserar i laget. Askvoll pensjonistlag set pris på at han i høg alder framleis deltar på treff i laget. Nellfrid Høydal som har vore sekretær i lokallaget, fekk overrekt nål og rose for sin innsats og som den som har lengst medlemstid. Askvoll pensjonistlag set stor pris på fortsett aktivt medlemsskap.

Underhaldning elles: Jorunn Stubseid og Geir Helle hadde arrangert 2 sketsjar. Kari Fismen introduserte skodespelarane, og dei 2 innslaga dei hadde, sørga for liv og latter i salen. Tema var humor omkring aldring og redusert hørsel.

Kaffi og kaker smakte godt etterpå. Kjøkkengjengen, som var styret pluss hjelparar i salen, gjorde ein bra innsats både med graut- og spekematserveringa samt kaffi og kaker.

Etter kaffien overtok RamSkogÅs scena. Dei sytte for flott dansemusikk, og dansegolvet blei godt brukt. Festen blei avslutta ca kl 20.15.

50  årsjubileum 8. juni 2022

Vel 30 personar møtte fram til pensjonisttreffet. Solveig Sølvberg ynskte velkommen, og etter allsongen "Din ungdom" hadde Kjell Grane ord for dagen: eige dikt om krigen i Ukraina, som han kalla "Den siste soldat". Dagens foredrag var også ved Kjell: Slektsgransking fortel om levevilkår. Bakgrunnen for foredraget var eit årelangt arbeid, som hadde starta med oppgåve på gymnaset. Vi fekk høyre om bu- og levekår på ein liten gard i Guddal, samstundes som vi fekk med mykje historisk stoff om gardsutvikling på Vestlandet. Avslutninga av foredraget var nær familiehistorie, som gav eit innblikk i helsetilbod og samferdsel i Askvollområdet for 50 år sidan.

Etter foredraget fortalde Marie Olset ei fin historie om skate, som oppfylgjing av Bjarne Haugen sitt innslag på førjulstreffet.

Allsong før maten var "Din tanke er fri". Matøkta bestod av gode smørbrød, kaffi og ostekake.

Åresalet gjekk av stabelen med god hjelp av Ingvild Strømmen som handterte Samfunnshuset sitt trekkeapparat. Utruleg mange flotte gevinstar, som dei frammøte hadde med.

Etter åresalet hadde Solveig litt informasjon frå styret: Årsmøte i Pensjonistforbundet Sogn og Fjordane går av stabelen på Skei 4. og 5. april. Askvoll pensjonistlag stiller med utsending og observatør. Elles var det påminning om Møteplassen og Prosjekt aktive møteplassar som varer til 15. juni. Det er stort behov for frivillige som kan stille opp som kaffevert og/eller datahjelpar. Det gjeld både no og ved ein framtidig møteplass. Besøksvennkurs i regi av prosjektet og Askvoll Røde Kors blir arrangert i Førde på Scandic Sunnfjord hotell 23.04. kl 15 - 18. Påmeldingsskjema med nærmare informasjon er klare til utdeling, oppmoding om å melde seg!

Pensjonisttreffet blei avslutta med allsongen "De nære ting".

Pensjonisttreff 23.03.22

Årsmøtet i Askvoll pensjonistlag gjekk av stabelen 23.02.22. Ca 45 personar møtte fram. Påmelding pga mat. Årsmøtesakene gjekk greitt, fint leia av Øystein Helle. Kjell Grane blei vald som referent og 2 møtedeltakarar melde seg til å skrive under. Rekneskap blei lagt fram ved kasserar Kari Fismen, årsmelding og handlingsplan ved leiar Solveig Sølvberg, val ved valnemnda representert ved Jorunn Stubseid. Endring i styret er at ein/eitt styremedlem, som ikkje ynskte attval, gjekk ut. Ein/eitt nytt styremedlem blei vald. Matøkt bestod av god betasuppe og kaffi med bløtkake til. Underhaldning ved Gitarvenninnene var populært, dei bidrog med songar før og etter maten. Spesielt for 2022 er at Askvoll pensjonistlag har 50- årsjubileum dette året.

Årsmøte  23.02.22

Treffet var annonsert på vanleg måte med plakatar og sms. Gratis deltaking. Pensjonistlaget hadde ynskje om å yte noko som kunne komme alle pensjonistar tilgode og hadde litt pengar att av statsforvaltningsmidlane. 56 personar var til stades, av desse 12 ikkje-medlemmer.

Kari Fismen ynskte velkommen og etter allsongen Julekveldsvise leste ho diktet Å leve i nuet av Piet Hein. Dernest underhaldning ved Helle X 3; Øystein, Geir og Solmund Helle song 3 viser og fekk publikum med på refrenget.

Bjarne Haugen fortalde om tradisjonen i sin familie med skate som julemat. Vi fekk vere med på heile prosessen med førebuing som starta i februar og som skulle ende opp som eit godt måltid julafta. Bjarne formidla stoffet på ein flott måte, og vi fekk sjå korleis tørka skatevenger ser ut.

Kjell Grane fortalde så om ein tradisjon frå juletider; maling av kors på døra for å halde vonde makter borte. Kjell hadde også sine kjelder frå eigen familie og har funne stoffet i samband med slektsgransking.

Før maten leste Kari diktet Den siste glede av J. Wilde. Juletallerken blei så servert på ein flott og effektiv måte.

Før dessert og kaffi hadde Solveig Sølvberg ei orientering om arbeid i laget. Planen Leve heile livet skal behandlast i kommunestyret i februar-22. Alle blir oppmoda om å finne planen på nettet, lese og fylgje med i vidare behandling i kommunen.

Karamellpudding og kaffi smakte godt. Helle X 3 bidrog med 2 songar. Jakob Øyren akkompagnerte og spelte til underhaldning etterpå. Solveig avrunda treffet, takka for underhaldningsinnslaga med litt "godis" frå Delikatessen. Treffet blei avslutta med allsong Det lyser i stille grender.

Førjulstreff  01.12.21

Askvoll pensjonistlag hadde besøk Mette og Vegar Vårdal frå Vågå, som bidrog med foredrag og musikk. Vegar Vårdal blei utnemnd til årets folkemusikar i 2020, og Mette Vårdal har tatt doktorgrad innan emne husmenn, bønder og embetsfolk. Bakgrunnen for besøket var ein innvilga søknad om statsforvaltningsmidlar. 39 personar møtte til arrangementet, og alle fekk del i ei fin kulturoppleving. Mette Vårdal formidla stoffet på ein interessant og lærerik måte med enkle illustrasjonar. Vegar Vårdal hadde med 3 feler og tok tilhørarane med på ei flott musikalsk reise. Vi fekk også høyre litt om bakgrunnen hans, med slektsrøter frå Vårdal.

Matøkt med påsmurde skiver, kringle og kaffe.

Treffet starta på tradisjonell måte; ord for dagen var ved Kari Fismen og allsong var Morgon på kobbeskjæret.

Alt i alt ein flott kulturettermiddag.

Kulturtreff i Askvoll pensjonistlag 06.10.21

38 personar møtte. Opning av treffet var songinnslag ved Jenny Sande Askevold. Med 2 songar blei dette ein fin start. Dernest kunne vi ynskje leiaren i pensjonistforbundet Sogn og Fjordane Nils Gjerland velkommen. Han ga fyrst orientering frå arbeidet i fylkeslaget og poengterte kor viktig det er at pensjonistforbundet kan ha politisk påverknad. Etterpå tok ha oss alle med på ei reise med utgangspunkt i eigne opplevingar gjennom livet. Det var underhaldande, interessant og gjenkjennande.

Etter matøkt med wraps/lefse, wienerkringle og kaffi var det åresal. Alle hadde med gevinstar og vi fekk hjelp av Ingvild Strømmen til trekkinga. Åresalet gjekk greitt unna og mange flotte gevinstar blei fordelte.

Avslutning med allsong og takk til alle frammøte for bidrag med gevinstar.

Din medlemsside

Er du ikke medlem?

Solveig Sølvberg