"Vestlandsblå viser om levd liv"

Kva var vi menneske utan dikt og draum? Songpoeten Helge Johnsen og kontrabassist Ove Mjåtveit har med seg begge deler når dei 18. mars gjestar Pensjonistforbundets fylkesårsmøte på Skei. Saman med gitarist Ivar Bruvik Sætre byr dei på songar merkte av levd liv – «viser for vaksne i alle aldrar», som Helge kallar det.

Songane deira er gjerne lågmælte, melodiske og nedstrippa, framførte med stålstrenggitarar og kontrabass. Dei har melodiar som løfter fram tekstar om livet som alltid er i endring, kjærleikens årstider, det vestlandsblå vemodet og humoren som kastar solskinet sitt ned i sinnets djupe fjordar.

Nokre av songane er slike Helge skreiv og brukte då han var ung visesongar på 1970-talet. Nokre er nye, og andre har tekst han har skrive til andre sine melodiar. I nokre høve har han gjort nyskapingar ved å kople saman dikt og melodiar frå ulike kantar. Storparten av det dei framfører er songar folk ikkje kjenner frå før.

Medlemmar og andre kan delta på konserten for kr. 150. Vipps til 831817 ved oppmøte på Thon hotell Jølster på Skei.