Stordal og Liabygda Pensjonistforening

Så var dagen vi har sett fram til komen – 44 personar var klare til dagsturen som turnemnda i Stordal og Liabygda Pensjonistforening hadde bestemt skal gå til Nordøyvegen. Storfjord Turbuss v/sjåfør Bjørn Ove Olsen kjørte oss trygt og behageleg gjennom heile turen. 

Bussen starta frå Valldal kl 09.00 , vidare til Skodje, Engsetdalen, Søvika og Skjeltene. Gunnar Standal frå Haramsøya var guide og hadde mykje interessant å fortelje  Som kjent skal Nordøyvegen binde saman dei fem Nordøyane - frå Lepsøya i sør til Harøya i nord, og til fastlandet. Første nye brua frå Skjeltene til Lepsøya – Lepsøybrua - er 50 m høg, 800 m lang og 41 m seilingshøgde– ei flott bru som vart opna i 2021. Så bar det det vidare gjennom den 3500 m lange undersjøiske tunnelen frå Hestøya til Austnes på Haramsøya – Haramsfjordtunnelen - Denne vart også opna i 2021. På Austnes fekk vi omvisning i den flotte Haram kyrkje som vart bygd i 1838. Her var fleire ting bevart frå den gamle stavkyrkja: altartavla frå 1670 i barokkstil, altarbordet og preikestolen i renessansestil, det broderte altarteppet og den nederlandske kyrkjeklokka frå 1484.    Spesielt beundra vi den flott utskorne altartavla med sitt rike biletprogram. På toppen står monogrammet til kong Christian 5, på eit skjold som vart halde av to løver, truleg henta frå det norske riksvåpenet..  Innvendige veggar og tak var rosemala i klare fine fargar. Ei flott kyrkje som var verdt besøket. 

Langs turen mot Longva fekk vi bl.a. sjå og fortalt om desse mykje omsnakka turbinane oppe på Haramsøyfjellet. Pga lite vind denne dagen var det nesten ikkje bevegelse i dei.  

På Gunnabuda vart vi ønska velkomne. Her fekk vi servert kaffi , nydeleg marsipankake og Kvæfjordkake (eller Verdensbeste som den også kalles)    Før vi sette oss i bussen igjen, nytte vi det fine området , rusla litt rundt, tok bilder, gjekk ned til sjøkanten, nokre fann fine fjøresteinar også, .. Spesielt den nybygde badstua var det mange som beundra. Trur nok mange kunne tenkje seg å prøve den – men den var nok låst………

Så gjekk turen vidare til Skuløya/Flemsøya, og tilbake til Haramsøya. Underveis fortalde Gunnar Standal bl.a. om «Grettes saga» – ei handling som foregjekk i ca. År 800 – 1050. Han viste oss Arnfinngarden der det i 1968 vart funne ca 1 kg gull (smykker) – såkalla Haramsskatten. Det skulle nedsetjast ein septiktank på garden der, då dei kom over dette funnet- det rikaste gullfunnet sidan jernalderen. Turen gjekk vidare til Brattvåg der vi fekk servert god kjøttkakemiddag - Mette og fornøgde vart vi nok ein gong. Frå Brattvåg kjørte vi om Vestrefjorden, Rekdal, Fiksdal og Tomrefjorden.

No var vi på heimveg – trudde vi. …. Men til vår store overraskelse svinga bussen av hovudvegen i Tomrefjorden og stoppa ved eit bustadhus som for dei aller fleste av oss var ukjent.  Her stod fam Sivert Petter Dyrkorn (utflytta Dyrkornbygdar) og tok imot oss. Her var stoler og bord utplassert i hagen, is og brus i flotte stettaglass vart servert, sola titta fram, praten gjekk og vi kosa oss. Sivert Petter fortalte litt om deira allsidige arbeid, bl.a er han leiar for eit stort rekneskapsfirma, dei driv begravelsesbyrå, blomster- og garnbutikk mm . Tusen takk til fam Dyrkorn for deira store gjestfriheit.    Det var ein overraskelse og veldig fin avslutning på turen.

Vi kom til Stordal ca kl. 20.00 - Alle gav uttrykk for at turen var vellukka, god guiding av Standal, god og behageleg busstur og veret var upåklageleg, Å få oppleve dette opne landskapet, øyer, fjorden og havet som låg der så blank og fin, er nok til stor glede for oss som kjem frå indre strøk og er vant med litt høgare fjell rundt oss, sjølv om høge fjelltoppar også har sin sjarm.

Leiar i pensjonistforeninga, Ann Elise Dyrkorn, takka for turen og ønska alle ein god sommar                  

NVB sekretær

Dagstur til Nordøyane

Jostein Kvithaug las fleire dikt frå diktsamlinga si.

IMG_5372

Onsdag 01.juni , kl 14:00, kunne leiar Ann Elise Dyrkorn i Stordal og Liabygda Pensjonistforening ønskje vel møtt til dei 64 medlemane som var møtt fram – gledeleg å sjå at så mange fann veien hit denne dagen. Ho ønska spesielt velkomen til Knut Sivert Vikenes og Jostein Kvithaug.

Før programmet starta,  sang  vi vår tradisjonelle velkomstsang – Sangen til bygda – godt fylgt av Knut Sivert som forsanger med gitar.

Ord for dagen vart halde av Inger Lianes Hove som las 2 dikt, «Gråver» av Jakob Sande og «Junikveld» av Hans Børli.  Johas Falck las deretter diktet «Høyrer du våren» av Martin Hjelme frå Valldal.

Knut Sivert underheldt med flott sang og gitarspill, samt nokre små fine og morsomme historier innimellom. Vi i salen sang med eller berre sat stille og lytta til dei fine sangane hans -  Bl.a. sang han «Wonderful to night», «Vi vandrer saman» og «Har du fyr» m.fl.

Jostein Kvithaug las mange fine dikt frå samlinga si, bl.a. «Det siste valget», «Helsevisa», «Laurdagsdansen», «Kvinnelisten»,  «Heimturen» m.fl..  Elles fortalte han mange gode historier – bl.a. frå ungdomstida si. Det var mange som kjente igjen slike hendingar/opplevelsar og vi fekk oss mang ein god latter.  Han avslutta med diktet «Siste lasset» - og fortalde også historia korleis dette diktet vart til.

Måltid med god kaffi, smørbrød og kringle vart servert denne gongen også. Og ikkje eit einaste møte i pensjonistforeninga utan åresal.  Åresalet skaper hygge og spenning, men viktigaste av alt er praten rundt borda både ved måltidet og elles.

Ann Elise informerte om dagsturen til Nordøyvegen som blir den 10.juni,  Bussen startar frå Valldal kl. 09.00. Vidare informerte ho om fleirdagersturen til Sogndal i august. Skal bu på Sogndal hotell , derifrå blir det fleire utflukter og opplevelser . Påmeldingsfrist 01. august. 

Frå Skodje Pensjonistlag har bl.a. Stordal og Liabygda Pensjonistforening fått invitasjon til Midtsommerfest i Nerskøyeløa på Skodje den 28.juni.   Her blir det norske og svenske songar av Stephanie Lippert, trekkspeltonar av Odd A Halaas, dans mm.   Dei medlemane som er interessert kan melde seg direkte til Skodje Pensjonistlag v/Paul Birger Tysnes.

Eit trivelig møte vart avslutta ca kl. 17:30 ved sang av Knut Sivert – «Vårsøg»

Ann Elise takka for frammøtet og ønskte alle ein fin og god sommar og vel møtt til neste medlemsmøtet i august. 

  

Norunn Vise Busengdal - referent

IMG_5009 (1)

Medlemsmøte  i Stordal og Liabygda pensjonistforening vart halde på Grendasalen, onsdag 04. mai, kl. 14:00.

Det er gledeleg å sjå at så mange møtte opp denne gongen også, 65 medlemar var til stades.   

Leiar Ann Elise Dyrkorn ønskja alle hjarteleg velkomne, og spesielt er det gledeleg at Jostein og Lars Arne Frostad, samt Jostein Maude også denne gongen er tilstades og gleda oss med flott musikk og sang (- Applaus). Vidare ønskja ho også Odd Kvammen hjarteleg velkomen.

Vi sang våre tradisjonelle og fine opningssangar «Sangen til bygda» og «Sang til Liabygda»

Sidan siste medlemsmøte har 2 medlemar gått bort, Kåre Hove og Bodil Holmen. Vi tente lys og held 1 minutt stillhet for å minnes desse to.

Ord for dagen vart framført av Steinar Lamo. Han las dikt av Marie Takvam: «Nissen gjeng gjennom skogen» og «Ved grava til ein Vestlands-småbonde»

Ann Elise orienterte litt om dagsturen til Nordøyane den 10. juni. 46 personar har meldt seg på turen pr idag. Det er fortsatt plass til fleire, så påmeldingsliste vart sendt rundt slik at fleire kan melde seg på om ønskjeleg.   

Ho gav også ei kort orientering om pensjonistturen til Sogn 15.-18.august. Meir info vil bli gjeve på medlemsmøte 01. juni.

Kveldens kulturelle innslag stod Odd Kvammen for. Han framførte fleire dikt frå diktsamlinga «Lyng i steinurd» av småbrukar og diktar Ivar Ringdal frå Hellesylt.  Vi fekk høyre fleire fine og personlege dikt frå samlinga, bl.a. «Fjellvandring», «Nattfiske», «Klag ikkje», «Agronomar»,  «Attanfor alt» m.fl     

Så var det tid for mat og kaffi, Kjøkkengjengen serverte flotte smørbrød og kringle, og dei frammøtte kosa seg med god mat og prat.  Leiar Ann Elise beklaga at ho måtte bryte av den gode praten og stemninga, for no var det tid for åresal og loddtrekning. Glade vinnarar fekk med seg gevinstar heim.   

Under møtet framførte Frostad\`s og Maude fleire kjente melodier/sangar og forsamlinga sang lystig med. Dei fekk som fortjent god applaus.

Ann Elise kunne også opplyse at det i dag har meldt seg 5 nye medlemar til pensjonistforeninga vår – veldig gledeleg.

Ho takka til slutt for frammøtet. Ønskja alle vel heim, bad oss ta godt vare på kvarandre og ha ei fin tid framover.   

Medlemsmøtet vart avslutta med sangen «La oss leve for kvarandre».

  

Norunn Viset Busengdal

sekretær

Medlemsmøte 04. mai

Sola skein frå ein skyfri himmel, - det var vår i lufta i dag. Det var mange som hadde funne vegen til medlemsmøtet denne gongen, ca 54 stk

Leiar Ann Elise Dyrkorn ønskja alle hjerteleg velkomne. Særleg ønska ho spelemennene Lars og Jostein Frostad, sangar Jostein Maude og Bjørg Jacobsen velkomne.

Til opning sang vi den velkjente sangen vår - «Sangen til bygda», med god hjelp av trekkspel, gitar og forsangar.

Deretter tente vi lys og hadde 1 minutt stillhet for å minnes avdøde medlem Jytte Holtleite.

Ord for dagen vart framført av Knut Hove – Diktet «Aa kunde du… » eit dikt skrive av Klara Josefine Seljehaug (1896-1963) Knut gav også ei utfyllande opplysning om diktaren og hennar livshistorie. Sjølv om ho i 1924 reiste til Voncouver, var Stordal alltid heimstaden hennar. Einaste gongen ho var heime i Stordal var i 1948.

Før leiar gjekk vidare på sakene som skulle behandlast, sang vi : «Sangen til Liabygda»

Rekneskapen 2020./2021

Rekneskapen for ovannemnde år blei ikkje ferdigbehandla på årsmøtet den 23. februar. Årsmøtet gav derfor fullmakt til f.k. medlemsmøte å behandle/godkjenne rekneskapen for åra 2020 og 2021

Rekenskapsoversiktene var oppkopiert og lagt ut på borda, i tillegg las Ottar Røren opp alle punkta i oversikta

Det vart opna for spørsmål og kommentarar til rekneskapen.

Ingen merknad – og rekneskapen for 2020 og 2021 vart såleis godkjent.

Val av valnemnd

Etter fullmakt frå årsmøtet den 23. februar, har medlemsmøtet fullmakt til å velge ny valnemnd for perioden 2022-23.

Følgjande personar vart valde med applaus:

Norma Rødset, Knut Hove og Reidun Røvreit Talberg.

Dagleg leiar Stordal frivilligsentral, Bjørg Jacobsen, orienterte deretter om Sykkelturen 2022 «Mer aktivitet, mer glede». 2022 er som kjent Frivillighetens år, og fleire organisasjoner samarbeidert om ein sykkeltur gjennom heile landet. Turen går frå Nordkapp til Arendal i tida 21. mai til 15. august. Ambassadør er Dag Otto Lauritzen (godt kjent frå forskjellige TV-program) - Butikkjeda Joker er generalsponsor. Hovudmålet med sykkelturen er å sette lys på meirverdien av å føle seg til nytte i samfunnet, og oppleve gode relasjonar i kvardagen.

I Fjord kommune vil dette bli arrangert 16. juni, , delt opp i 3 etapper. Den første etappen starter ved foten av Trollstigen, så til Valldal og vidare til Stordal. Sykkeletappen i Stordal starter ved Øvrebust bru

og til Allmenningen i sentrum. Frivilligsentralen er oppfordra til å skape eit mangfald av aktivitetar på tvers av generasjonar, kulturar og samfunnslag langs ruta. Dette blir nok veldig bra.

Bjørg Jacobsen oppfordra til å melde seg på å sykle. Alle syklane er elektriske, og blir frakta mellom slutten og begynnelsen av kvar etappe. Ho opplyste vidare at Pensjonistforbundet har sponsa ein av syklane.

Ho nemnte også heilt avslutningsvis om Utstyrsbasen ved Frivilligsentralen, der mykje utstyr kan lånast gratis .

Dagsturen i år går til Nordøyane den 10.juni Program var oppkopiert og lagt ut på borda til orientering. Påmeldingsliste blei sendt rundt.

Så var det tid for mat og kaffi. Kjøkkengjengen serverte flotte gode smørbrød, gjærkringle, bløtkake og praten gjekk livlig rundt borda – høyrdes ut som alle kosa seg.

Åresalet gjekk fort unna, Det ligg alltid ei lita spenning over stunda med trekking – det er jo kjekt å vinne .

Frostad\`s og Maude underheldt med livlig sang og musikk/allsang. Innimellom fortalde Maude morsomme historier frå tida han var organist her i Stordal, så vi fekk oss mang ein god latter.

Til slutt takka leiar for frammøtet, ønska alle vel heim , bad oss ta godt vare på kvarandre og ønska oss alle ei riktig god påske!

Medlemsmøtet vart avslutta med sangen «La oss leve for kvarandre…»

NVB

referent

spelemennene Lars og Jostein Frostad, sangar Jostein Maude.

Stordal og Liabygda medl

Medlemsmøte 06. april

Stordal og Liabygda pensjonistforening har i tida frå oktober 2021 til februar 2022 gjeve tilbod om bowling for alle eldre i vårt område. Vi har hatt avtale med Kulå Bowling v/Kalla Teresa Socka i Valldal. Der har vi hatt avtale om grupper på 10 peronar om gongen, bowling og servering - pizza med drikke, kaffi og kake.

Og vi har hatt avtale med "Best" i Stordal, der Frank Olsen har stått for transport til og frå.

I perioden har vi transportert omlag 60 besøk til bowlinga.

Tilbakemeldingane frå deltakarane har vore udelt positive, muntre og glade

BOWLINGRAPPORT

Onsdag 23. februar vart årsmøtet i laget halde i Grendasalen i Stordal. Etter at møtelyden var ynskt velkomen av leiar Ann Elise Dyrkorn spela Lars Arne og Jostein Frostad opp og Sangen til bygda blei sunge.

Så var det rett på sak med årsmøte og opplesing av årsmelding både for 2020 og 2021 grunna coronaen. Her fekk vi vite at medlemstalet har gått litt ned frå 98 til 92 medlemmar ved siste årsskifte. då har vi alle ein jobb å gjere med å invitere andre pensjonistar til å kome på eit møte. Rekneskapsføraren gjekk gjennom rekneskapen før valnemda kom med si innstilling. Den blei godkjent med applaus, og det nye styret er:

Leiar         Ann Elise Dyrkorn

Kasserar     Torill Sandvik

Styremedlem  Johan Møllerhaug   

    "        Norunn Busengdal

    "        Ottar Røren

Varamedlem  Else Vinje 

    "        Ole Jakob Rødset

Ut av styret gjekk Else Pedersen, Judit Møller og Steinar Lamo som fekk kvar sin blomsterbukett for innsats i laget over fleire år. Då var det tid for kaffipause med dei gode smørbrøda som kjøkkengjengen alltid varta opp med, og i tillegg sidan det var årsmøte både bløtkake og marsipankake. Ikkje å vente anna enn at praten gjekk lett rundt småborda i salen. I tillegg fekk vi ein liten konsert av musikarane frå Tomrefjorden der dei varta opp både med gamle slagerar og fin dansemusikk. På repertoaret fekk vi høyre mellom anna Zansibar, Trønderbrura, Sail along silvery moon og mange fleire til velfortent applaus. Ein allsang etter konserten var Høyt over fjellet, og så vart det åresalg med trekking av mange gevinstar og informasjon frå leiaren. Det gjaldt fylkesårsmøtet 8. mars på Rica Parken Hotell og neste medlemsmøte. Her er datoen endå ikkje bestemt men plakatar blir sett opp. Så takka leiaren for frammøtet og vi avslutta med å synge La oss leve for hverandre

SL

Stordal og Liabygda P

Årsmøte i Stordal og Liabygda Pensjonistlag

Stordal og Liabygda pensjonistforening ved leiar Ann Elise Dyrkorn, har invitert til julebord, tysdag, 07.12.2021 kl 16. Veret og føret er bra.

Klokka går mot 16, gjestene er i kjømda, Ann Elise står i døra og tek imot.

Smittevernreglane er ivaretekne på ein god og praktisk måte.

Då klokka rundar 16, ynskjer Ann Elise 30 gjester vel møtt, og seier mellom anna at vi er ikkje så mange, men vi skal ha det kjekt likevel. ”Sangen til bygda” med Marius Berglund på trekkspel, er den naturlege opninga.

Etter ei lita stund med finpuss på kjøkenet, kjem maten, alt som høyrer til tradisjonell julemat. Vi forsyner oss og vi et godt, medan praten går. Maten er av vanleg Nilsgardstunet kvalitet -  premium.

Når gjestene er forsynt, tar vi ein pause og syng ”Julekveldsvisa” med trekkspelet attåt.

Så kjem eit velfylt dessertbord frå kjøkenet, vi forsyner oss og vi et igjen.

Ann Elise er tydeleg oppteken av at vi skal ha det bra, og spør fleire gonger om det og får stadfesting av trivselen.

Etter desserten, inviterer Ann Elise til ein minikonsert med Marius Berglund. Han spela i om lag 40 minutt, mange nummer vekslande på trekkspel og to-rader, reine virtuosen. Samstundes gjekk praten, kanskje ikkje så høglytt som den ville gjort uten musikk. Og kanskje måtte musikaren  konsentrere seg litt meir enn han hadde trengt uten praten.

Då er vi nøgde, reiser oss og syng ”Deilig er jorden”.

Ann Elise takkar for frammøtet og håper vi kan treffast på medlemsmøte andre onsdagen i januar, og ynskjer God Jul til alle og ynskjer alle Vel heim.

Klokka 19 er vi ute igjen.

Julebord på Nilsgardstunet

Onsdag den 3. var rundt 50 av medlemmane møtt fram til Grendasalen i Stordalshallen til sosial samling med underhaldning, sang og musikk.

Leiar Ann Elise Dyrkorn ynskte vel møtt, og så var vi i gang med Sangen til bygda. Roger Lid frå Vestnes sto for trekkspelmusikken til allsangen. Så tente leiaren eit lys for ein medlem, Gudrun Overå som har gått bort sidan siste møte og som vi mintes med eitt minutts stille. Ord for dagen var eit par små haustdikt med fokus på haustfargar og naturen elles på denne tida av året. Deretter ein ny allsang med mange vers så her skulle det syngast til trekkspelmusikken. 

Då var det Knut Hove sin tur der han starta med å vise oss  lysbilde frå det gamle klyngetunet til Hovsgardane frå eldre tider. Vidare ned til sjøen med alle nausta på rad og rekke både i Hovsbugen og i sentrum av bygda og bortover til øyrane der det er både campingplass og småbåthamn i dag. Vi fekk sjå gatebilde frå eldre tider og industrien i startgropa der mykje skjedde i gamle brakker, og fjordabåten ved den første gamle trekaia. Knut hadde kommentarar og opplysningar til bilda så vi blei godt informert om utviklinga frå bondesamfunn til industribygd, så dette blei som ein lokal historietime. Etter dette smakte det godt med ein matpause med gode smørbrød og kringle til kaffien. Vidare i programmet fekk vi både nokre flotte trekkspelnummer av Roger Lid der polkaen På Scooterføre toppa minikonserten. Leiaren informerte om den komande gratis kyrkjekonserten med Maria Holand Tøsse torsdag 11. november i kyrkja, gratis bowling på Kulå i Valldal og om julebord som i år blir på NIlsgardstunet 7. desember. Og ikkje eit møte utan åresalg og trekking av mange gevinstar før vi avslutta med La oss leve for hverandre og leiaren takka for frammøtet og ynskte vel heim, og ta vare på kvarandre!

SL

Din medlemsside

Er du ikke medlem?

Nyheter

Kategori

Vis også nyheter fra