Stordal og Liabygda Pensjonistforening

Pensjonistforbundet Møre og Romsdal

Pensjonistforbundet

Stordal og Liabygda Pensjonistlag markerte eldredagen i medlemsmøte onsdag 6. oktober der godt over 50 medlemmar og ikkjemedlemmar var møtt fram til middag og festleg samver. Leiar Ann Elise Dyrkorn ynskte vel møtt og så var vi i gang med åpningsangen til komp av Lars Arne og Jostein Frostad. Ho orienterte også om at Eidsdal og Norddal Pensjonistlag arrangerer Fjord Kommune sin eldredag på Røde Kors huset i Eidsdal seinare i månaden.

  

Etter ein allsang fekk dagens underhaldar Vidar Parr ordet, og han har ordet i si makt kan ein seie. Han var innom tema som eldre, gammal mann og måltid som nons som er forsvunnen i vår tid. Alt med eit humoristisk glimt. Retteleg morosamt blei det når Parr framførte eit tenkt intervju med ei dame på vel 100 år som hadde god greie på gardar og slektskap i ei lita grend. Om husken av og til svikta for dama henta ho seg inn igjen sjøl om slektskapet kunne bli nokså innfløkt, til høglytt humring blant tilhøyrarane. Verkeleg ei triveleg stund når avismannen opprinneleg frå Dyrkorn kåserar, til velfortent applaus. Neste post på programmet var middag og her hadde vertskapet på Nilsgardstunet stilt opp ein bufe med kjøtkaker og tilbehør der vi sjølve kunne forsyne oss etter at coronarestriksjonane er avslutta. Praten gjekk rundt borda medan vi venta på kaffi og bløtkake, og musikarane varta opp med ein liten minikonsert der vi mellom anna fekk høyre Sommernatt i Froland og Zanzibar. Allsang til De nære ting vart det og før det vart seld årar og trekt gevinstar. 

Etter kaffi og kake spurde leiaren forsamlinga om vi vil ha julebord eller julemøte og gjerne i Nilsgarden, dette blir endeleg bestemt på novembermøtet. Nestleiar Johan Møllerhaug ville gjerne vite om medlemmane var interessert i bowling. Laget kan søke om midlar til ei ykt med bowling, pizza med drikke til og transport til Kulå i Valldal frå Stordal Auto. Alt er gratis sa Møllerhaug, det er berre å melde seg på, "først til mølla" på telefon 450 27 945.

Før leiaren takka for ei triveleg stund sang vi som vanleg La oss leve for hverandre, og vi tok på heimveg både mette og glade.

SL

Eldredagen på Nilsgardstunet

Se alle medlemsfordeler

Les Pensjonisten digitalt

Bli medlem

Medlemsfordeler

Om Pensjonistforbundet 

Finn lokalforening

For tillitsvalgte

**FELLES REFERAT FRÅ ÅRSMØTE/MEDLEMSMØTE.**

Eigen årsmøteprotokoll med meir utfyllande opplysningar er skriven i samsvar med lokalforeningane sine retningsliner - § 4a.

I dette **felles** referatet blir det derfor referert **kun** vedtaka frå årsmøtet som er gjort i kvar enkelt sak .

Etter at leiar Ann Elise Dyrkorn opna møtet med å ønskje alle hjarteleg velkomne, sang vi våre tradisjonelle opningssangar «Sangen til bygda» og «Sangen til Liabygda» - fint akkompagnert av våre trufaste sang- og spelemenn «Nabolaget».

**Sak 1 – Godkjenning av innkalling :** _Innkallinga godkjent._

**Sak 2 – Godkjenning av sakliste:** _Saklista for årsmøtet 2024 godkjent._

**Sak 3 – Val av ordstyrar og referent:**  

*   _Olav Bratland - ordstyrar._ \- _Norunn Viset Busengdal - referent_

**Sak 4 – Val av 2 personar til å skrive under årsmøteprotokollen:**

_Magnar Skjellum og Tora Åmodt Moe_

**Sak 5 – Årsmelding 2023:** _Årsmelding 2023 for Stordal og Liabygda pensjonistlag vart samrøystes vedteke._

**Sak 6 – Rekneskap 2023:**

_Årsmøtet ber styret vurdere å opprette ein bankkonto som gjev renter._

_Rekneskapen for 2023 for Stordal og Liabygda Pensjonistlag vart elles vedteken slik den låg føre._

**Sak 7 – Val av nye medlemar/varamedlemar til styret:**

Etter valet vil styret vere samansett slik:

*   Ann Elise Dyrkorn - leiar (attval)
*   Kristen Leganger - nestleiar
*   Knut Hjelme
*   Norunn Viset Busengdal - sekretær (attval)
*   Ole Jakob Rødset (ny)

Varamedlemar: Else Vinje og Arna Øvrebust (attval)

S**ak 8 – Val av revisor og vararevisor.** Johan Vinje - revisor . Kjell Talberg - vararevisor (attval)

**Sak 9 – Val av Turnemnd.** _Sindre Helland , Alfred Johansen og Bjørg Hjelmset (attval)_

 **Sak 10 -Val av valnemnd.** _Jonas Falch (ny) , Ingebjørg Holtleite og Solveig Kvammen_

**Sak 12 – Val av utsending til Fylkesårsmøtet:**

_Leiar Ann Elise Dyrkorn vert pensjonistlaget sin utsending til Fylkesårsmøtet 2024.   Styret får fullmakt til å velge styremedlem som skal delta på fylkesårsmøtet som observatør._

Alle val vart vedteke med applaus. Ann Elise Dyrkorn takka for tilliten på attval som leiar. Ho retta ei stor takk til ordstyrar Olav Bratland for fin og oversiktleg gjennomføring av valet.

Som avslutning på årsmøtet fekk avtroppande styremedlem og rekneskapsførar Ottar Røren overrakt blomster som takk for god innsats for laget gjennom mange år.

**Årsmøtet** vart avslutta kl. 15:00 og **MEDLEMSMØTET** vart deretter sett :

Medlemsmøtet starta med sangen «Litt gammel» - akkompagnert av Nabolaget med Westerås som forsanger.  Ein sang med snert av humor og som fekk ein til å drage litt på smilebandet.

For første gong prøvde vi oss med Quiz på medlemsmøte. Kvart bord fekk utdelt 10 spørsmål med 3 alternative svar.  Litt hjernetrim  . Som premie fekk dei 3 beste laga kvar sin twistpose til fordeling.  . Då det viste seg at dette er ønskjeleg fleire gongar, vil styret lage til Quiz på eit og anna medlemsmøte gjennom året.

Kjøkkengjengen serverte gode karbonade-/salatsmørbrød og bløtkake til varm og god kaffi.  Praten gjekk livlig rundt borda.

Ikkje eit medlemsmøte utan åresal – dette gjekk fort unna og vinnarane fekk med seg gevinstar heim som ein får håpe dei fekk glede og nytte av.

**Leiar orienterte om fylgjande:**

\-         Leiar Ann Elise Dyrkorn og nestleiar Kristen Leganger vert laget sine utsendingar til f**ylkesårsmøtet** på Molde i mars.

\-         Styret har sett opp ein førebels **handlingsplan for 2024** (pr. 07. februar):

22\. februar og 29. februar : Bowling Bowling

06\. mars : Hørselhemming v/Hørselshemmedes Landsforbund Indre Sunnmøre

10\. april   : Arild Hoksnes – journalist/humorist/musikar

04\. sept. : Storfjordens Venner

*   Deltaking på teater og konsertar, Bussturar - både dags- og fleirdagers turar med ymse opplevingar
*   Diverste foredrag og underhaldning
*   Ymse kurs/oppfriskningskurs

Takk til Nabolaget som gjennom møtet spelte opp til fleire allsangar – bl.a sangen «Barn av regnbuen» - ein liten hyllest til den folkekjære og avdøde visesangaren Lillebjørn Nilsen. 

Leiar Ann Elise Dyrkorn takka til slutt for frammøtet - ønskte alle vel heim og velkomne til neste medlemsmøte 06. mars.

Møtet slutt kl. 17.00.                                                     NVB – sekr.

Stordal og Liabygda Pensjonistlag

Elevane frå hjelpebedrifta - Vasanthavasan, Bonsaksen Remme og Støversten.

Bonsaksen

Nok eit år er historie, og Stordal og Liabygda sitt første medlemsmøte i 2024 vart halde på Grendasalen onsdag 10.. januar

Her var karagjengen i sving og sette fram bord / stolar  og dekka fine bord m.m.  På kjøkkenenet førebudde damene god mat som seinare i møtet skulle serverast -   Alt var klart i god tid før møtet starta kl. 14.00 og heile 80 medlemar fann etterkvart  sin plass rundt borda.  Praten , latteren gjekk frå første stund,  - Og gledeleg var det å sjå at så mange hadde funne vegen til Grendasalen denne dagen.

 Leiar Ann Elise Dyrkorn ønskte alle hjarteleg velkomne med eit  ønskje om eit godt nytt år. Orkesteret «Nabolaget» spelte opp til pensjonistlaget sine tradisjonelle opningssangar «Sangen til bygda» og «Sangen til Liabygda»

2 medlemar har gått bort sidan sist vi hadde medlemsmøte. Lys vart tent og ett minutt stillheit vart halde til minne om Leif Stavdal og Ottar Storheim.

Hjelpebedrifta «Innsats for andre» er eit valfag for elevar ved Stordal skule. 3 elevar var tilstades og presenterte prosjektet som går ut på å hjelpe folk i bygda  med diverse gjeremål, som f.eks. handle, vaske, måke snø, hente post mm. Eit flott tilbud som dei håpte mange vil gjere seg nytte av.  Interesserte kan ringe tlf. 988 79 830 (Natalie Støversten) mellom kl. 17.00-20.00 alle kvardagar. Dei tok også fram at ei anna hjelpegruppe er tilgjengeleg for «Mobilhjelp» - denne gruppa er å treffe på Frivilligsentralen kvar onsdag mellom kl. 13:00-14:00. Begge desse tilbuda gjeld fram til vinterferien 19.-23. februar (veke 8).

Bjørnar Midtbust tok oss med på ei flott natur-reise -  det var bilder frå lavlandet, sæterstølar, fjelltoppar både i nærområdet og ute ved kysten. Det er ikkje berre naturen ein vart fascinert av, men også dei fantastiske fargane som han har fanga opp – glødande himmel over fjelltoppar som igjen speglar seg i blankstille sjø og fjellvatn, urørte snødekte marker og trær – stillheit/fred,   Vi fekk også nokre glimt frå turen dei har hatt til Dolomittane i Italia. Ein tur han anbefalte på det sterkaste.  Bjørnar er også ein sangglad person, og han framførte 2 songar som han sjølv hadde laga tekst til. Den første var til melodien «Har du fyr» , der han tolka ordet «Fyr» på fleire forskjellige vis ,- noko som fekk latteren fram hos oss. 

Takk til Bjørnar for fantastiske bilder, og med hans iver og forteljarglede vart nok trongen til å kome seg ut i naturen større for mange av oss som sat i salen. 

Innimellom programinnslaga underheldt «Nabolaget» oss med fin sang og musikk  framført på trekkspel, gitar og munnspel . Når ein tok eit blikk gjennom salen, såg ein kor  dei sang/nynna med - gjerne med eit smil om munnen. Denne muntre sangen/musikken av gamle gode slagere, treffer nok mange av oss i vår alder

Ikkje eit møte utan mat og kaffi.  Kjøkkengjengen serverte nydelige karbonade- og  salatsmørbrød, kringle og kaffi.   Og praten gjekk – tydeleg at det var kjekt kome saman.   Åresal høyrer også med på møta våre, og dette vart unnagjort i kaffipausen .   30 gevinstar vart etterkvart tildelt dei heldige vinnarane.

Styret har diskutert ymse tilbud til medlemane, bl.a. å kome igong med bowling igjen – noko som gir både litt konkuranse og det sosiale.  –  Det vart derfor sendt ut liste slik at interesserte kan skrive seg på. Ein vil kome attende til opplegget på møte den 07. februar.

Vidare orienterte leiar om at Seniortrimmen starter opp tirsdag den 16. januar på Grendasalen – – 1 gruppe kl. 14:00 og 1 gruppe kl. 15:00.   

Nabolaget spela opp og vi avslutta møtet med sangen «Singel og sand» . Ann Elise takka for frammøtet, ønskte alle vel heim og at ein må ta godt vare på kvarandre.

Møtet vart avslutta kl. 17:00.

  

NVB ref.

Stordal og Liabygda pensjonistlag

IMG_0765 (1)

IMG_0783 (1)

IMG_0935 (1)

  

**FJORDAFESTEN** vert kvart år arrangert i samband med FN´s Internasjonale Eldredag 01. oktober.

Dette arrangementet vert årleg arrangert av dei 3 lokale pensjonistlaga i Fjord kommune, og i år var det vårt lag – Stordal og Liabygda pensjonistlag – som hadde ansvaret for arrangementet.

Den 14. oktober var Stordalshallen klargjort til festen.

Sjølv om det var skikkeleg ruskever denne dagen med mykje regn og vind , møtte ein «varmen» når ein kom til Stordalshallen – ein festsal som var flott pynta med fine haustfarger og lys på borda.

Etterkvart vart salen fylt med festglade gjester – 137 personar fann sin plass ved borda. Her møttes folk frå heile Fjord kommune og praten gjekk frå første stund – tydeleg at det er kjekt å treffast.

Leiar Ann Elise Dyrkorn opna festen med å ynskje alle hjarteleg velkomne, spesielt til dei innbedne gjestane – Leiar i Møre og Romsdal pensjonistforbund Anne Lise Hessen Følsvik og Fjord kommune sin repr. Olav Løvoll.  Vidare retta ho ei stor takk til næringslivet som har støtta laget anten økonomisk eller ved å gi gevinstar:

**Blåtind Boutique Hotel, Hofseth International, Helland Møbler, Bonett, Maschine- Control AS, Gjensidige Indre Sunnmøre, Sparebanken Møre, Anita Systue, Moe Entreprenør AS, Busengdal AS, Peder Øie AS, Joker Stordal, Sparkjøp Digerneset, Geiranger Turbuss.**

Også takk til Fjord kommune for lån av Stordalshallen og kopiering av sanghefter.

Kommunepolitikar og leiar i Fjord eldreråd – Olav Løvoll – takka for invitasjonen og den store innsatsen Stordal og Liabygda pensjonistlag har gjort i samband med arrangementet. Han overrakte blomster som takk frå kommunen.

Etter at vi hadde sunge vår tradisjonelle opningssang «Sangen til bygda» - var det Anne Lise Hessen Følsvik som ønskte å seie nokre ord. Ho opna med å takke for invitasjonen og gratulerte med dagen - FN\` s Internasjonale eldredag.  -Denne dagen blei første gong markert offisielt i 1990 og sidan den gong har dagen vore markert kvart år verda over.

Viktige tema ho tok fram var- :

\-         Viktig å rette oppmerksomheit mot eldre menneske sine behov når det gjeld helse og god livskvalitet. Befolkninga vert eldre – i 2050 vil 1 av 6 vere i alderen 65+

\-         FN\`s motto i 2023 er brudd på menneskerettigheitene – noko som gjeld for alle – også eldre som mottek omsorg. Dei alvorlegaste brudda i Norge skjer overfor dei sjukaste og svakaste. Ho uttrykte skuffelse over tilstrekkeleg politisk vilje til å gjere noko med desse forholda.

\-         Ein treng fleire sjukeheims- og heildøgnsplassar,

\-         Ein treng fleire og betre kvalifiserte tilsette i eldreomsorga, samt betre arbeidsvilkår for dei tilsette.

\-         Digital inkludering hos eldre. Mange er frårøva moglegheita til å utføre tjenester dei før har klart fint sjølve, men som manglande datakunnskap no sèt ein stoppar for. Pensjonistforbundet har i mange år jobba hardt for å få fram brukarperspektivet i alt som dreier seg om e-helse, velferdsteknologi og digital kommunikasjon.

\-         Sjølv om pensjonistforbundet er ein nøytral organisasjon, oppfordra ho flest mogleg til å engasjere seg - bl. a. i dei kommunale eldreråda og andre stader der det går an å vere med å påverke.

Ho avslutta med eit fint dikt av Marie Lovise Widnes - «Livsglede»

Så var scena klar for musikalsk underhaldning.

Jenny Marita Sørås spelte piano og framførte 2 sangar med ei fantastisk innleving og stemme. Sangen «Nature boy - Aurora» har ho sjølv skrive teksten til.  Deretter sang ho «Floden» av Bjørn Eidsvåg.

Så entra Virusha Nagulesweran scena med sin fargerike og glitrande klednad. Ho fortalde at dansen ho skulle framføre heiter «Thilana» Dette er ein dans som stammer frå den klassisk indiske danseforma Bharatanatyam. Den er kjent for sine vanskelege rytmer, raske føtter og innfløkte bevegelsar.  Ein vart fascinert over å sjå korleis ho viste fram dei ulike rytmiske mønstera og det utfordrande fotarbeidet medan ho uttrykte musikken gjennom bevegelsane sine.

Stor applaus frå salen både til Jenny Marita og Virusha.

Orkesteret som laget hadde fått til underhaldning , var frå Stordal. På ein humoristisk måte presenterte dei seg for «PUF , Pensjonistforbundets Ungdomsfylking»   Det er no ein gong slik at vi i vår alder ikkje kjenner ungdomane så godt, men likevel er interessert i å høyre kvar dei kjem ifrå. Så her måtte dei fortelje namnet sitt og kven foreldra deira er – ein kjekk og morsom presentasjon.   Takk til «Pensjonistforbundets Ungdomsfylking» som underheldt oss med livlig sang og musikk.

Så var det tid for middag . Nydeleg kortreist biffgryte med tilbehør frå Nilsgardstunet vart servert av ein dyktig kjøkkengjeng. Medan bløtkake og kaffi vart fortært, fekk dei frammøtte høve til å kjøpe tombolaårer, samtidig som praten gjekk livlig rundt borda.

Bjørg Moltu kom på scena og framførte morsomme innslag i ord og tonar. – Med seg hadde ho «han som vann prinsessa og halve kongeriket» - Magne Staurset som var med som musikalsk tonefølgje . Det var visst ikkje så heilt lett å få han med seg til å gjere dette, men ho hadde både lokka og trua – ho hadde sine knep, meinte ho…. (latter)  Stordal og Norddal kommunar er no samanslått til Fjord kommune, og her tok ho fram viktigheita det er å få nær tilgang til kvarandre sitt kulturliv, fjella og naturen, gå dei same råsene – for ikkje å snakke om markedet – eit heilt nytt marked! Med ein snert av både humor og alvor fekk ho sagt nokre ord om legesituasjonen, dei store avstandane over fjord og fjell, sterke naturkrefter og ekstra utfordrande er det også no når dei har bestemt at ferga til Eidsdal skal ligge stille i 3 veker. – reine risikosporten – meinte ho. For å unngå at kommunen skal kome på Robeck-lista, avslutta ho med å ta fram tryllestaven med fylgjande ønskjer: Akra kadabra - budsjett i balanse, stå saman for å skape vekst og gode kår i alle bygdene, fellesskap m.m.

Takk til Bjørg for eit humoristisk innslag.

Så var det tid for trekning av alle gevinstane - alltid litt spenning rundt det.

Nestleiar Kristen Leganger overrakte blomster til leiar Ann Elise Dyrkorn som takk for det oversiktlege og gode arbeidet ho har gjort i samband med dette arrangementet, det fell ekstra mykje på henne når eit slikt arrangement skal gjennomførast.  Sekretæren i laget fekk også overrakt blomster som takk – overraskelse for begge to…

Avslutningsvis takka leiar alle frammøtte og håpa dei hadde kosa seg.

Vidare vart det retta ei stor takk til alle frivillige som har brukt tid og krefter for å få dette arrangementet vèl «i hamn» - både dagane før, under og etter festen.

\-         Applaus frå salen som takk –

NVB

Sekr.

Stordal og Liabygda pensjonistlag sitt første møte etter sommarferien, vart halde på Grendahuset onsdag den 13. september. 

Då møtet starta kl. 14:00 var nesten alle stolar og bord fullsatt – i alt 68 møtte fram denne dagen, Sjølv om vi ser fjelltoppane har fått eit fint slør av kvit nysnø i løpet av natta, var det ein fin haustdag.

Leiar Ann Elise opna møtet med å ynskje alle hjarteleg velkomne og håpte alle hadde hatt ein fin sommar.

Musikarane Fylling og Skrove var på plass og spelte opp til opningssangen vår «Sangen til bygda»

Lys vart tent og vi hadde ett minutt stillheit til minne om avdøde medlem Leif Overå.

Inger Lianes Hove las eit fint dikt av Halldis Moren Vesaas – «Om at leve i nuet»

Forfattar og pensjonert lærar Audbjørg Gjerde Lippert fortalde og viste bilder frå turen ho hadde til Antarktis ved nyttårstider 2009.  Etter nokre dagar i Buenos Aires flaug dei vidare til øygruppa Ildlandet - ei øygruppe som dannar Sør-Amerikas sørspiss. Her låg båten «FRAM» og venta på dei ca 235 spente og forventningsfulle personane som skulle vere med på denne turen/ekspedisjonen. Det tok eit par døgn før dei nådde land på Antarktis. Nokre stader var dei på land, andre stader utsyn frå båten.  Antarktis er eit område som ingen hadde vore på før for eit par hundre år sidan, berre observert av enkelte rundt 1820. Den første som steig i land, var visstnok nordmannen Carsten Borchgrevink – Han var leiar for British Antarctic Expeditionen i 1898-1900. Viktige meteorologiske og magnetiske observasjonar blei gjort då. Så hadde vi nordmannen Roald Amundsen som nådde fram til sjølve Sørpolen i 1911. 

Først då dei kom til Peterman Island, ei lita øy på vestkysten av Antarktishalvøya, fekk dei gå i land. Her var det ein britisk forskningsstasjon frå 1941-1962. Den vart imidlertid opna igjen som museum i 1996 og turistane fekk kome innom museet. Då måtte dei berre kjøpe kort og sende heim til seg sjølve - Eit bevis og minne om at dei virkeleg hadde vore til Antarktis .  Eit minne som sit sterkt att hos Lippert, var dei fascinerende flytande isfjella i Wilhelmina Bay. Her losna også eit isfjell ikkje langt frå der «FRAM» låg og ho såg det frå lugarvinduet sitt - både ein opplevelse, men også litt skremmande.   Synet av Table Icebergs (bordisfjell) på Antarctic Sound var også veldig spesiell fordi fjella her var heilt flate på toppen og opptil 5 km lange  Fuglar og dyr var også å sjå på Antarktis – spesielt var synet av pingvinane av ulike slag. Heile strender og oppetter fjellsidene var dekte av dei. Elles var der kval, spekkhoggere, sjøløver og sel – dei fekk sjå litt av kvart.

Det var interessant å høyre frå ekspedisjonen både i ord og i bilder.  Tusen takk til Audbjørg Gjerde Lippert.

Takk også til Fylling og Skrove for sang og musikk, ispedd med gode og morsomme historier.

Så var det tid for kaffipause og prat. Kjøkkengjengen serverte karbonade- og salatsmørbrød, samt kringle.  Det smakte veldig godt og praten gjekk livlig rundt borda. Viktig også å få god tid til å prate med kvarandre innimellom underhaldninga – ein del av det å kome saman.

Åresalet gjekk unna og fleire gjekk heim med gevinstar i handa.

Leiar gav ei orientering frå den fine turen pensjonistlaget hadde til Savalen 06.-08. september. Geiranger Turbuss v/ Tobben var sjåfør og guide. Turen starta frå Stordal over Trollstigen med stopp og lunsj på Dombås.. Då dei kom til hotellet – Savalen Fjellhotell og spa - vart dei mottekne av eit hyggelig vertskap, god service og ein god felles middag litt seinare. Hotellet hadde mange fasiliteter som kvar og ein kunne benytte seg av, treningssenter, innendørsbasseng, sauna mm. Dag 2 var det tur til gruvebyen Røros. Gruvene er nedlagde og andre næringar har teke over, men byen og minna er likevel mange. Fekk bl.a. omvisning i den heilt spesielle åttekanta Røros kirke frå 1784, også kjent som Bergstadens Ziir. Det var også tid til ein liten handlerunde før ein køyrde attende til hotellet for middag/sosialt samvær/dans. Dag 3 var det avreise etter frokost med lunsj underveis. Vêret var flott på heile turen og alle gav uttrykk for at dei var storleg fornøgd.

Vidare orienterte leiar om Fjordafesten som skal vere den 14. oktober. Mange bedrifter har sponsa laget, anten økonomisk eller ved å gi store verdifulle gevinstar til utlodning. Arrangering av Fjordafesten vert elles kunngjort ved plakatar og kunngjering i lokalavisene. Påmeldingsfrist er 01. oktober.

Din medlemsside

Er du ikke medlem?

Eldredagen på Nilsgardstunet

Andre nyheter